DESTACADAS

Marcel Mauri, vicepresidente de Omnium Cultural

Reinventar o Estado. Marcel Mauri, vicepresidente de Ómnium Cultural, ten claro que pasados corenta anos dende a aprobación da Constitución, hai que falar de todo sen atrancos no Estado español, como se faría en calquera país. Ve lóxico que á Monarquía “coa folla de servizos que ten” sexa cuestionada polos cidadáns, e asegura que “a actuación do Estado, da Xustiza e do Goberno”, teñen orixinado que cada vez máis persoas en Catalunya aposten pola autodeterminación. Mauri, que en ausencia de Jordi Cuixart, no cárcere desde hai case ano e medio, pilota unha entidade cultural clave no impulso do procés, anticipa que vai haber unha “condena política” aos presos cataláns, polo que denunciarán “todo tipo de irregularidades”, á espera do que depare a “segunda volta” no tribunal de Estrasburgo.
En Santiago, na Facultade de Ciencias da Comunicación, Marcel Mauri participou na presentación dunha ampla enquisa realizada a xornalistas, en todo o Estado, que abrangue interrogantes sobre o código ético, presións políticas ou dependencia das fontes gobernamentais. Mauri foi designado xefe de gabinete e de comunicación da alcaldía de Badalona en 2016 e, no 2017, asesor do vicepresidente do Govern e conseller d´Economia ata que entrou en vigor o artigo 155. O ingreso no cárcere de Jordi Cuixart supúxolle a asunción da vicepresidencia de Òmnium Cultural.

Ler máis

Alpabardas Verdes

TEMPOS NOVOS ofrécevos o artigo gañador do XIV Premio a Artigos Xornalísticos Normalizadores Concello de Carballo 2018, para publicar nos medios colaboradores o domingo 27 de maio. Trátase de “Alpabardas Verdes”, de Carlos Lixó:

“Entrei na casa e bañoume un cheiro intenso a caldeirada, a voz de miña nai ouvíuse no fondo, atende ao que ten túa nai, unha cousa que nunca viches, tróuxenos para ti. Enriba da mesa uns toros de peixe cocido que para os meus ollos pouco espertos podería ser perfectamente xarda apañada antes do tempo. Abre un, abre. E fiquei parvo. Tiña por dentro unha espiña dunha cor tan bonita e tan intensa e tan difícil de definir… O máis próximo sería o espazo entre verde mar e azul turquesa. Apunta a palabra que despois esquénceme, son pataguillóns.”

Ler máis

Entrevista: Michèle Matterlat

Nas facultades de Xornalismo dos anos setenta e oitenta falábase moito dos impactantes traballos de Armand Mattelart. Moito menos dos textos da súa compañeira, pero tamén. Michèle Mattelart publicou en 1977 A cultura da opresión feminina e, en 1982, Mulleres e industrias culturais, libro no que defende que os medios están condicionados histórica e socialmente, e que a súa función responde ás necesidades dun sistema de poder. Trinta e cinco anos despois, no marco do primeiro congreso internacional de comunicación organizado por investigadores galegos integrados en Agacom, advirte dos efectos sobresaturantes dos medios. Denuncia o ambiente “sexista”, e propón obviar o “presentismo” mediático coa lectura de ensaios e a práctica da reflexión. “Hai que evitar os medios que te poden saturar”, postula, e situarse “nos intersticios da globalización sen vendermos a alma”.
Este é un extracto da entrevista realizada por Luís Villamor para o número 249, do mes de febreiro de 2018, para a revista TEMPOS NOVOS

Ler máis

I GALA DOS MEDIOS EN GALEGO

A I Gala dos Medios en Galego reuniu hoxe no local da Liga de Amigos de Barallobre, en Fene, a representantes políticos e do mundo cultural e social da man asociación Amega (Asociación de Medios en Galego), impulsora da celebración. A gala é a antesala da celebración do Día dos Medios en Galego, para o que se elixiu o 7 de febreiro por coincidir co aniversario do nacemento da publicación periódica “O tío Marcos da Portela”, xurdida en Ourense en 1876 con Valentín Lamas Carbajal como editor. Será precisamente o vindeiro mércores día 7 cando o Parlamento de Galicia faga unha declaración institucional apoiada por todos os grupos políticos.

Ler máis

CATALUNYA, UN MES DE SUSPENSE

Xa non hai volta atrás. O proceso de desconexión de Catalunya avanza cara o 1 de outubro e o goberno de Madrid vixía por terra, mar e aire os movementos do independentismo para abortalo. Rotas todas as pontes entre a Generalitat e a Moncloa, nada pode evitar o choque de comboios. Cantos saian á rúa para darlle valor reivindicativo á Diada do vindeiro 11 de setembro, farano dispoñendo desde a víspera dunha lei de transitoriedade coa que canalizar a nova legalidade republicana no momento do desamarre, e coa convocatoria unilateral dun referéndum -“Quere que Catalunya sexa un Estado independente en forma de República?”- publicada no Diari Oficial da Generalitat. A estas alturas, é difícil predecir en que vai dar ese tour de force entre, por unha banda, quen tenta exercer o chamado dereito a decidir e quen, pola outra, tenta impedilo cunha combinación de ameazas, tribunais e forza policial. Moito menos doado é predecir a folla de ruta do día despois no probable caso de que, pese a todo, a cidadanía poidera finalmente depositar o seu voto nas urnas. Non houbo nestes últimos 40 anos ningún outro momento que revestise tanta tensión política.
(Avance do Informe publicado en TEMPOS NOVOS 244 de setembro de 2017)

Ler máis

Un día do galego para os medios en español

A Asociación de Medios en Galego lamenta a discriminación da Xunta sobre os medios escritos na lingua do país con respecto aos que o fan en español, e reclama o cumprimento do artigo 19 da Lei de Normalización Lingüística cando marca que “o goberno galego prestará apoio económico e material aos medios de comunicación (…) que empreguen o galego dun xeito habitual e progresivo”.

Ler máis

A médica Iria Veiga gaña o XIII Premio a artigos xornalísticos de lingua Concello de Carballo

O XIII Premio a artigos xornalísticos normalizadores Concello de Carballo 2017, dotado con 1.250 euros e a publicación nos medios de comunicación colaboradores, foi para o artigo «Inchazón», da médica psiquiatra do Hospital do Barbanza, Iria Veiga

Ao certame presentáronse 42 traballos.

Ler máis
Algúns dereitos reservados - Tempos Dixital 2011