OPINIÓN

La calle es mía

Pepe Árias

Muitas vezes é complicado ver as linhas do passado e unilas com o presente. Dentro do Estado espanhol, nestes 30 anos de normalidade democrática culminados com umha reforma constitucional que corta direitos sociais, repete-se umha máxima existente dende há anos: 
mudar todo para que nada mude realmente. Por outra parte, ficou demonstrado que a Espanha indissolúvel dos touros, o flamenco e a deturpaçom da cultura própria denostada a “bailes regionais” só mostra a sua fortaleza diante das reclamaçons nacionais e sociais dos povos, que reclamam o direito de autodeterminaçom como parte das suas esperanças num futuro digno.

Ora bem, se o alcaide dumha cidade como, por exemplo, Compostela, é capaz de sequestar entre valados e polícia municipal a manifestaçom dos indignados do 15 de Outubro, nom podemos mais do que estremecer aguardando novas medidas de fascistizaçom social. Em primeiro lugar, estamos a falar dumha mobilizaçom nom violenta, na que a sua composiçom era tam dispar como a que pode existir num centro comercial: jovens e idosos, adolescentes, crianças, etc. Em segundo lugar, as instituçons impedem que o espaço público seja utilizado para qualquer outra cousa que nom seja ir de compras ou fazer visitas turísticas. Quando entramos no Obradoiro valado lembrei-me daquele discurso de Salvador Allende, no que defendia como consigna que se abririam as grandes alamedas, denunciando o mesmo que sofrérom perto de 12.000 pessoas no passado sábado. Por outra parte, se lembramos os abusos denunciados por Esculca durante o Dia da Pátria do 2011 contra o independentismo, ou a tomada policial da cidade na visita do Chefe de Estado vaticano, veremos como os direitos já nom só dumha minoria, senom do conjunto da cidadania, vulneram-se de forma permanente nesta cidade.

Como metáfora de todo este processo, o atual governo municipal aprovou dar a Fraga Iribarne umha rúa numha Compostela repleta de cámaras de vídeo-vigilância. Resulta um paradoxo que um dos responsáveis da censura da nossa língua, que participou num gabinete fascista com as consequências que todos conhecemos, se apresente com a indiferença de quase todos. Como algo assim pode passar desapercibido? Seguramente é porque nesta cidade tomada, o estado de excepçom permanente já esta normalizado nas retinas de todos e de todas, e apenas umha provocaçom ao sentido comum como esta fica silenciada, aguardando melhores tempos.

Avatar of Tempos Dixital

Edición dixital da revista Tempos Novos
Artigos relacionados

Deixa un comentario

Únete ao debate!
A publicación de comentarios está suxeita a moderación.

Deixa unha resposta

Algúns dereitos reservados - Tempos Dixital 2011